मोटरसाइकलबाटै पर्यटक फालाेट पुग्न थाले

फालेलुङ, पाँचथर ।
पछिल्लाे समय पाँचथरको फालेलुङ गाउँपालिका जिल्लाकै पर्यटकीय हबको रुपमा चिनिँदै गएको छ । स्थानीय सरकार पर्यटन प्रवर्द्धन गर्न लागीपरेकाे छ भने आन्तरिक तथा बाह्य पर्यटक आउनेको भीड बाक्लो देखिन थालेकाे छ । यहाँ आएका पाहुनालाई स्थानीय सरकारले नै स्वागत गर्न थालेकाे छ ।

भारतको कोलकताबाट आएका दुई युट्युबर/ भ्लगर सान्तायन दास र सुबेन्दु बिस्वास पहिलो पटक मोटरसाइकलबाट तीनसिमाना/फालोट र चारराते पुगे । उनीहरुलाई गाउँपालिकाको कार्यालय थकेपुङमा गाउँपालिका अध्यक्ष वीरबिक्रम थाम्सुहाङ, प्रमुख प्रशासकीय अधिकृत डम्बरबहादुर आङ्देम्बे, जनप्रतिनिधि र पर्यटन अभियन्ताहरुले मायाको चिनो सहित स्वागत गरे। उनीहरुले भावुक हुँदै भने, ” सम्मानसहित यतिकाे स्वागत कहीँ पाएका थिएनौं । वेष्ट बङ्गालका मानिसहरु घुम्न अत्यन्तै रुचाउँछन् र घुम्न जाने सबैभन्दा नजिक, सुरक्षित र सस्ताे ठाउँ सन्दकपुर, फालाेट नै हाे । तर बाटाे सहज नभएकाे साथै बाइक अनुमति नभएकाेले धेरैले इच्छा मारेर बसेका छन् । बाइकबाट फालाेट पुग्ने सपना पूरा भएकाेमा ओैधी खुशी छाैं । अब याे रुट हुँदै धेरै बाइकर्स आउने छन् ।” बेलुका मौसम सफा थियो । हिमश्रृङ्खला आँखाअगाडि देख्दा खुसीले गहभरि आँशु झार्दै आफूहरुले इतिहास रचेकाे बताए । याक, चौंरी, चराचुरुङ्गीको आवाजसँगै नेपाल र भारतको सीमाना हुँदै विभिन्न ठाउँको अवलोकन गर्न पाउँदा उत्साही थिए ।

समुन्द्री सतहबाट लगभग ३२ देखि ३६०० मिटरको उचाइमा रहेकाे ती क्षेत्रहरु पर्यटकको रोजाइमा पर्न थालेको छ । पाहुनालाई खान, बस्नको लागि केही होमस्टेहरु अनि गाउँ बस्तीहरुमा व्यवसायिक रुपमा होमष्टे सञ्चालनमा आएपछि पर्यटकलाई थप सहज भएकाे छ । प्राङ्बुङमा फालेलुङ सामुदायिक होमस्टे सञ्चालनमा छ । त्यहाँ छिमेकी राष्ट्र भारतको पर्यटकहरुको उपस्थिति बढ्न थालेकाे होमस्टे संस्थाका अध्यक्ष रिता राईले जानकारी दिनुभयाे ।

इ.सं. २०१८ देखि भारत सरकारले सिंहलिला नेशनल पार्क संरक्षणार्थ मोटरसाइकल प्रवेश बन्द गरेपछि माेटरसाइकलबाट सन्दकपुर फालाेटसम्म घुम्न चाहने लाखाैं पर्यटकहरु निराश भइरहेकाे बेला नेपाल हुँदै फालाेट, चारराते र सन्दकपुर पुग्ने मार्ग खुल्दा पर्यटक ओैधी खुशी देखेकाे अभियन्ता डिल्ली आञ्जुमले बताए । उनले थपे,” स्थानीय सरकार त लागेकै छ अझ फालेलुङकाे लागि पर्यटक बनेर आउने सबैलाई जीवनबीमा गराइदिने गरे पर्यटक थप आकर्षित हुन्थे ।” अहिले स्थानीय सरकारकाे कार्यविधिमा प्रति बाइक प्रवेश शुल्क रु १ सय ५० रुपैयाँ ताेकिएकाेमा शुरुमा आउने दुई जनाकाे नलिए पनि बाँकी प्रवेश गर्ने प्रति बाइक रु. १ सय ५० रुपैयाँ प्रवेश शुल्क तिर्नुपर्ने हुन्छ । आर्थिक विकासकाे मेरुदण्डको रुपमा लिइएकाे पर्यटन व्यवसाय प्रवर्द्धनमा पालिकाले नयाँ नीति, कार्यक्रम साथै याेजना निर्माण र कार्यान्वयनमा गए राेजगारी बढ्ने साथै पर्यटन व्यवसाय फष्टाउने निर्विवाद छ ।