पाँचथरमा ५४ वटा पक्की कुलो सिँचाइ योजना निर्माणको काम सुरु

पाँचथर।

पछिल्लो समय ग्रामीण क्षेत्रमा खानेपानी, सिँचाइ नहुँदा बसाइँसराइ सर्नेको सङ्ख्या बढ्दो देखिन खालेको छ। गाउँघरमा खेतीयोग्य जमिनहरू भरपर्दो सिँचाइ नहुँदा बाँझिदै गएको किसानहरूको गुनासो छ। तर, नेपाल सरकार र स्विट्जरल्यान्ड सरकार साना सिँचाई (स्वीस) को लगानीमा खेतीयोग्य जमिनहरुमा सदाबहार सिँचाइ हुने गरि पक्की कुलो बनाइदिएपछि किसानहरू उत्साहित भएको छ।

पाँचथर जिल्लामा मात्र आर्थिक वर्ष २०८०/०८१ मा ३९ वटा नयाँ र १५ वटा क्रमागत गरि ५४ वटा पक्की कुलो बनाएर २ हजारभन्दा धेरै किसानलाई सिँचाइको सुविधा पुर्याउन लागिएको साना सिँचाइ फिल्ड क्लष्टर संयोजक केशव लामाले जानकारी दिनुभयो । 

जिल्लामा ५ वटा स्थानीय तहमा काम सुरु भएको छ। जस्मा फिदिम नगरपालिकामा १५ वटा, याङ्वरक गाउँपालिकामा १३ वटा, फालेलुङ गाउँपालिकामा १० वटा, मिक्लाजुङ गाउँपालिकामा ९ वटा र फाल्गुनन्द गाउँपालिकामा ७ वटा पक्की कुलोको काम सुरु भएको लामाले बताउनुभयो ।

भरपर्दो कुलो बनाएर किसानहरूले कृषिजन्य वस्तुको राम्रो उत्पादन हुने र आत्मनिर्भर बन्न सक्ने भएकोले ग्रामीण क्षेत्रमा सिँचाइको योजना सुरु गरेको बताउँछन् । यस आर्थिक वर्षमा जिल्लाको ५ स्थानीय तहमा २४ करोड ७४ लाख लगानीमा काम सुरु भएको छ।

जिल्लामा नेपाल सरकार र स्विट्जरल्याण्ड सरकारको लगानीमा विगत ४ वर्षदेखि निरन्तर कुलो निर्माण हुदै आएको छ । गतवर्ष पाँचथरको ४ वटा पालिकामा ४८ वटा पक्की कुलो बनाउन २५ करोड ९ लाख लगानी भएको थियो । बनेको नयाँ कुलोबाट पाँचथरका १८ सय १२ घरधुरी किसानले थप सिँचाइ सुविधा पुगेको लुवाफु खोला, लिगिम्वा, हाम्राङ सिँचाइ जलउपभोक्ता संस्थाका अध्यक्ष घनेन्द्र केरुङले बताउँनुभयो।